Scrivemo ‘n Siciliano (Maissalise) picchí è cosa giusta fare accanuscere sta beddra terra puru accussí e picchí ni piace. Stu dialetto è scialuso como a niatri!
Marsala Factory è un centru culturale ‘ndipendente dunne ponnu trasire sulu i Viaggiatura chi doimmino ni struttura amiche.
Foírme d’arte diverse, droco e luntane, sunnu a so anima. Si trova a Marsala, in una casa ri campagna cu un ranne jardino e una terrazza ri runne si pò vírere u panorama da Riserva Naturale Orientata ru Stagnune (canusciuta comu “Stagnune”) chi lassa tutti senza ciatu pi l’emozione.
A maizo 2018 accuminciò sta beddra avventura ri Marsala Factory chi è aperta da primavera all’autunno ri ogni annu, lívato u 2020 pi stu fitusu Covid19.
A Factory nascío cu mostre assistemate, tanticchia cà e tanticchia ddrà, nu jardino; scole ri cucina du postu; tramunta ri musica e firriuna o Stagnune n’capo u LT28 Volkswagen (fuigone di dri beddri anni ’70) e tante avutre belle cose!
Sta cosa vole cogghire diveisse foirme d’arte, ranno a possibilità a tutti l’artista ri farisi accanuscere in un posto pairticolare, runne ponnu stare cocche jornu, durmennu puro no b&b ra Factory. Tutti i loro travagghi ponnu stare cà, pi essere taliati ri Viaggiatura chi venno, pigghianno Marsala Factory come vitrina e, si piacino, ponnu essere accattate. I musicanti ponnu sunare. No quanno si roimme, però!
Niatri ramo una mano a tutti e puro una birra! Ni piacino i cose fantasiuse ma puro a pasta cà saissa e milinciane fritte.
Pò veníre cà puro cu di arte unni capisce nente ma vole apprezzare chiddra di l’avutre.
Niatri vulemo bene a tutti i Viaggiatura chi hanno rispetto pa a struttura e pi cu ci vive, attareddri compresi.
Do 2019 Marsala Factory è puro notiziario scritto su internette (i ‘nglisa ci ricino “blog”) chi parla ri arte, mostre, spettacula ri teatro e avutre belle cose chi ci sunno in Sicilia, a Roma e a Milano.
—
———————————————————————————————-
N.B. Tutti i mostre e l’eventi ri Marsala Factory sunnu aperti sulu all’ospiti chi doimmino ni struttura ricettive signate na stu situ.
